مقابلة مع رائد الأعمال صالح الغامدي: منصة غانم و الترميز العقاري في السعودية
- Emad Altayyar
- 12 فبراير
- 11 دقيقة قراءة
يسعدني أن أشارككم مقابلتي مع صالح الغامدي، الشريك المؤسس والرئيس التنفيذي لشركة غانم، في حوار شيق ومثمر حول مستقبل التقنية العقارية (PropTech) في المملكة العربية السعودية.
ناقشنا في هذا اللقاء رحلة صالح الملهمة من عالم التسويق إلى ريادة الأعمال في قطاع الـ FinTech والـ PropTech، وكيف قادته خبراته في شركات كبرى مثل فوديكس ونون ولين تكنولوجيز إلى تأسيس "غانم" التي نجحت مؤخراً في إغلاق جولة استثمارية بقيمة 7.1 مليون دولار.
تطرقنا إلى مفهوم التملك الجزئي للعقارات (Fractional Ownership) والترميز العقاري (Tokenization)، وكيف تساهم هذه المفاهيم في تغيير وجه الاستثمار العقاري في المملكة، وجعله متاحاً للجميع ابتداءً من 1000 ريال فقط.
كما تحدثنا عن أهمية البيئة التجريبية لهيئة العقار ودورها في دعم الشركات الناشئة، والتحديات التي تواجه رواد الأعمال في هذا القطاع الواعد، بالإضافة إلى رؤية صالح المستقبلية لشركة غانم وقطاع الـ PropTech في ظل رؤية 2030.
مقابلة مليئة بالمعلومات القيمة والنصائح الملهمة لكل من يهتم بقطاع العقار، والتقنية، وريادة الأعمال.
يمكنك الإستماع للقاء كاملاً هنا:
نص اللقاء كاملاً
عماد: طيب اول شيء حابين ان نتعرف على صالح الغامدي يعني يا ريت لو تدينا نبذة عنك مين هو صالح خارج البورد روم زي ما يقولوا.
صالح الغامدي: الله يحييك اخوي عماد شكراً لك على هذه الجلسة الطيبة، اخوك صالح خريج تسويق عملت طول خبراتي المهنية في البزنس في تقاطع البزنس والتكنولوجي؛ فعملت في فوديكس، عملت في نون دوت كوم، عملت في إمكان فاينانس، وعملت في لين تكنولوجيز (Lean Technologies) للمصرفية المفتوحة. الخبرات هي عبارة عن مكس بين التكنولوجي والفاينانس والبزنس، الاكسبوجر على هذه القطاعات خلانا نشوف فرصة قبل غانم اللي هي فرصة التملك الجزئي في السعودية، لكن على الصعيد الشخصي اساساً خريج تسويق وعملت من أيام الجامعة في قطاع التسويق والمبيعات طال عمرك.
عماد: ما شاء الله تبارك الله، طيب يعني هذه كانت نبذة مهنية، فهل في جانب شخصي ممكن نقدر نعرفه عنك يعرفنا عليك اكثر؟
صالح الغامدي: والله شوف احنا جيل "الورك هوليك" (Workaholic) فالتعريف يكون دائماً تركيز ومهني، ولكن على الصعيد الشخصي انا من مواليد المنطقة الشرقية وانتقلت الى الرياض قبل تقريباً سبع سنوات. خلينا نقول خارج ساعات العمل جلساتنا كلها مع رواد اعمال ومع شباب مؤسسين نتعلم منهم، ولكن كهوايات شخصية محب للبر ومحب للرياضة، 100% هذه هواياتي الشخصية.
عماد: جميل جداً، بالعودة الى مسيرتك المهنية زي ما قلت انت نشوف انك خريج تسويق وعملت في تقنية الاعمال، يعني كيف قادك هذا المسار الى عالم التقنية المالية والتقنية العقارية يعني من تسويق الى فنتك وبروبرتيك؟
صالح الغامدي: طبعاً هو كان "ناتشرال" (Natural) تطور طبيعي ما كان استثنائي لأن اتوقع لما دخلت فودكس قبل سبع سنوات تقريباً مصطلح "الفنتك" كان مصطلح جديد تقريباً، لكن كنا محظوظين انه عملنا على الفنتك. فبعد فودكس لما توجهت الى إمكان للتمويل كانت الفكرة او التطور طبيعي وسهل بسبب وجود عنصر التقنية المالية في فودكس انتقل الى إمكان للتمويل.
إمكان للتمويل كان فيها اكسبوجر وتعرض ممتاز لخبرات التقنية المالية، ما يخفى عليك انه إمكان كان عندها طموحات كبيرة وارقام كبيرة حققت اغلبها في السنة الاولى ما شاء الله تبارك الله واطلقوا منتجات ناجحة، انا كنت من اوائل الموظفين في الشركة فمعناها شفنا كيف المنتجات المالية تبنى من الصفر.
طبعاً هذا برضه تطور طبيعي الى المصرفية المفتوحة في "لين تكنولوجيز" التي أسسها هشام الفالح، وهي تعمل على البنية التحتية.
اغلب عملاء المصرفية المفتوحة شركات لها علاقة بمدفوعات او تمويل، فمرتبطة كخبرة بالعمل اللي مارسناه في فودكس وفي إمكان للتمويل، فسبحان الله "الناتشرال بروجريشن" (Natural progression) كانه جاي بشكل متناسق. المصرفية المفتوحة كما تعلمت هي تحت اشراف البنك المركزي فالجاهزية ومستوى الحوكمة يجهز كل السوق، فبعد لين تكنولوجيز لما بدأنا منصة "غانم" كان بالنسبة لنا سهل تطبيق متطلبات الحوكمة بسبب خبرتنا في التعامل مع مشرع صارم مثل البنك المركزي.
عماد: ما شاء الله تبارك الله، يعني الباين انه مسيرة كانت حافلة، فبداية من فودكس وقطاع الفنتك الى البروبرتيك فالتقنية بشكل عام انا بالنسبة لي دائماً تأسرني واحب استكشف فيها المجالات الجديدة، يعني انا ما اكذب عليك انا تحديداً شخصياً اول مرة اعرف عن "التوكنايزيشن" (Tokenization) قبل شهر وكانت معرفتي عن طريق تطبيقكم، فعشان كده شدني الموضوع، يعني يمكن حسب ما فهمت انتم واحدة من تسع شركات واعتقد انتم من اول الناس اللي فعلاً بدأوا طرحوا فرص وصار لها توكنايزيشن، فما شاء الله تبارك الله اعتقد غطيتوا حالياً فرصتين بالكامل.
صالح الغامدي: طبعاً الفرص السابقة كانت فرص حق انتفاع، احنا الان بدأنا في التملك الجزئي. التملك الجزئي تركيزه الاساسي هو "التوكنايزيشن"، زي ما ذكرت هي فقط الفرصة الاولى الان اللي موجودة على التطبيق، الفرصة هذه انطلقت مع اعلان معالي الوزير يوم 26 يناير واللي هي "فراكشنال أونرشيب" (Fractional ownership). في هذه الفرصة بعد اكتمالها سيتم التوكنايزيشن او التجزيء للصك وكل واحد يتسجل باسمه الجزء الخاص فيه. فهو كفكرة فعلياً بدأ الان، لكن عشان تشوف الصك الجزئي يصدر باسمك بيبان بعد اكتمال الفرصة كيف يطلع شكله في السجل العقاري وايش التفاصيل. طبعاً كل عملنا ضمن البيئة التجريبية للهيئة العامة للعقار هم المشرفين وهم اللي يتأكدون ان كل الشركات تنجح بإذن الله.
عماد: طيب خلينا نرجع خطوة لورا، ايش القصة وراء تأسيس "غانم" يعني ايش الفجوة اللي انت شفتها في السوق قلت انا ابغى اسوي هذا الشيء؟
صالح الغامدي: الصراحة من اليوم الاول من بداية 25 كان في اتفاق بين المؤسسين والشركاء انه التملك الجزئي حيكون سوق كبير وواعد وكذلك كان في تصور انه التشريع قادم للسعودية الذي يدعم التملك الجزئي، فلما بدينا كنا جاهزين فبنينا البنية التحتية كتقنية وكبراند. "غانم" من اغتنام الفرص، التقنية جاهزة من أتمتة المدفوعات والربط مع البنوك وبوابات الدفع وبناء قواعد البيانات وأنظمة التقارير والسايبر سكيورتي وخلافه، فسبحان الله كان عندنا تصور وتفاؤل انه التملك الجزئي قادم للسعودية وفعلاً وصلنا الموافقة المبدئية من البيئة التجريبية السنة الماضية تقريباً شهر خمسة او ستة. لما وصلت الموافقة بدأنا التجهيز وا يعني الحمد لله بعد عمل أشهر قدرنا نطلع فيها لايف.
عماد: ما شاء الله تبارك الله، انا يمكن كنت ابغى اسألك السؤال اللي بعده بس انت ضمنياً جاوبت عليه، انه اسم "غانم" مميز يعني انا كنت اعتقد لما اتواصل مع الملاك حلاقي واحد فيكم اسمه غانم، فانت اعتقد شرحت الفكرة انه هو من اغتنام الفرص.
صالح الغامدي: بالضبط "غانم" هي من اغتنام الفرص لأنه حرصنا ان الاسم يكون له علاقة بطريقة عمل السوق هذا، فتلاحظ انت كثير من الناس يجيك في آخر لحظة يقول عندي فرصة نحتاج بكرة نفرغ لها فهذا الشيء موجود في السوق كعرف.
فاغتنام الفرص شيء اساسي في القطاع العقاري زي ما انت عارف، يعني يمكن في احد العقاريين طلع قبل فترة في بودكاست يتكلم عن انه العقاريين الجريئين هم اللي يغتنمون الفرص بسرعة، فسبحان الله هذا هو سوق العقار، اللي يربحون وينجحون فيه هم اللي يغامرون وياخذون قرارات بسرعة وهم فاهمين السوق طبعاً.
عماد: اتفق معك طيب هذا برضه يجيبنا للسؤال اللي بعده اللي هو متعلق بجزء من الشجاعة، انت كنت بتقول انه اساساً سوق العقار يتطلب شجاعة في اغتنام الفرص، بس بشكل عام تأسيس شركة ناشئة في قطاع جديد تكنولوجياً اساساً لسه ما هو مفهوم، يمكن في الجزء الثاني من المقابلة حنفهم ايش هو التوكنايزيشن اكثر، بس ايش هي اكبر المخاطر اللي واجهتها عند اطلاق غانم وكيف تعاملت معها؟
صالح الغامدي: الحقيقة لما تاخذها من منظور ريادة اعمال بعدين منظور تشريع واوبريشن؛ فمن منظور ريادة اعمال طبعاً انت تحتاج فريق مؤمن بالرؤية، فكيف تقنع فريق وانت ما عندك منتج ولا دخل؟ هذا تحدي ومخاطرة. كذلك تحتاج شركاء ومستثمرين مؤمنين بالرؤية وبالفريق، فهذا برضه تحدي آخر تشتغل عليه كشريك مؤسس. من الناحية الاخرى في طبعاً مخاطر تشغيلية وتشريعية، يعني مثلاً ممكن المشرع يحط متطلبات معقدة او يتاخر، او يكون شكل المنتج النهائي غير مناسب. فكل هذه الاشياء تعتبر مخاطر، فبطبيعة الحال العمل في بزنس جديد ماله تشريع سابق فيه كل يوم تغييرات، فإذا كنت "فلكسبل" (Flexible) وكان عندك الفريق المناسب تقدر تتاقلم بإذن الله تعالى.
عماد: انا من اللي استشفيته في المجال هذا انه ممكن يكون اصعب شيء انك تلاقي المالك او المطور اللي مستعد يعرض عقاره بالطريقة هذه، هل هذا فعلاً شيء صادفك؟
صالح الغامدي: الحقيقة انه في تقبل ايجابي من الملاك انهم يعرضون ويستخدمون الترميز العقاري، لكن طبعاً الفكرة جديدة بتحتاج شوية تثقيف في الاجراءات بسبب وجود اشتراطات معينة من الهيئة العامة للعقار ولكن التقبل ايجابي والعقاريين مبادرين صراحة.
عماد: طيب دحين حنخش على الجزء "التك" (Tech) زي ما يقولوا اكثر عشان نبسط المفهوم للناس، يعني ممكن انا وانت نعرف ايش هو التملك الجزئي وانت اخبر مني، فاحتاج تقول لي ايش هو التملك الجزئي وكيف خلى غانم هذا الشيء متاح للناس بداية من 1000 ريال؟ يعني اليوم انا عندي 1000 ريال اقدر اكون عندي صك؟
صالح الغامدي: طيب التملك الجزئي هو باختصار حل مشكلة الوصول الى الاستثمار في العقار بدون الحاجة انك تدفع مليون او مليونين، فبدل ما تشتري الصك كامل تشتري جزء منه باختصار. ولكن لو نرجع في التاريخ ونشوف الاستثمار في العقار في السعودية كخيارات ايش في خيارات موجودة؟ بشكل عام عندنا خيارين: عندنا "الريت" (REIT) وعندنا "صناديق التطوير". "الريت" التحدي فيه انه يتاثر بسوق الاسهم فما تقدر تضمن قيمة الاصل انها تستمر بشكل طبيعي، والموضوع الآخر اللي هو الصناديق العقارية الهدف منها تطويري والتوزيعات فيها تتاخر. احنا اليوم نتكلم عن نموذج جديد اضافي يحل اكثر من مشكلة؛ اولاً التوزيعات تبدأ اسرع لانه في ايجار غالباً، العقارات في التملك الجزئي تكون مدرة للدخل وعقارات قائمة ما تكون تحت التطوير. هذا غالب الامر فلذلك التوزيعات او الايجارات تجي من فترة مبكرة، بعدين عندك مشكلة نزول وصعود قيمة الاصل بشكل غير منطقي الموجودة في الريت، هذه المشكلة ما هي موجودة لان قيمة الاصل هي العقار وانت تملك جزء من الصك نفسه مسجل في التسجيل العقاري.
عماد: طيب انا في نقطة برضه شخصياً بفكر فيها لما جيت دخلت التطبيق وقلت ابغى اجرب الفكرة بس في حاجة نوعاً ما ردتتني خصوصاً للناس اللي ساكنين في الرياض بعد قرار تجميد ارتفاع الاسعار الايجارية، انا الان كمستثمر حطيت مبلغ فلنفرض 10000 ريال وتملكت منه نسبة، وبيجيني بما يقابل هذه النسبة عوائد ايجارية، انا بالنسبة لي هذه العوائد الايجارية حتكون ثابتة، كيف يعني هذا الشيء حيخليني اخذ عائد على الاستثمار متنامي؟
صالح الغامدي: طبعاً هذا القرار هو لخدمة البلد والبزنسز والمواطنين فالأولوية الاساسية ان الرؤية تتحقق اللي هي التوازن العقاري. الفرص العقارية ما زالت موجودة، الفرصة المطروحة عندنا العائد فوق 7% وما زال يعتبر ايجابي، مربط الفرس وش؟ انه كونه ثابت لا يعني انه شيء سلبي، احنا جميعاً هدفنا التوازن العقاري مع وجود عائد منطقي، فلذلك نحن "ألايند" (Aligned) على الفيجن الخاصة بالتوازن العقاري. بالعكس احنا نشوف انه "بوزيتيف" (Positive) للسوق، السوق حيعتدل حيكون العائد منطقي والكل حيستمر، فكل هذه الامور قاعدة تشتغل لخدمة هدف أكبر.
عماد: هو لا شك انه التوازن العقاري في صالح المواطن والبلد بشكل عام، لكن المقصد من السؤال كان انه هل "التوكنايزيشن" في الفترة الحالية حيكون مغري اكثر خارج الرياض كـ منظور مالي؟
صالح الغامدي: ممكن نعم ويعتمد على نمو قيمة العقار لكن بشكل عام ممكن نعم.
عماد: طيب الان غانم يعمل ضمن بيئة تجريبية لهيئة العقار او نسميها "الساند بوكس" (Sandbox)، ايش يعني هذا الشيء للمستثمرين وايش هي اهمية هذا الاطار؟
صالح الغامدي: طبعاً في تجربة جميلة في السعودية صارت اللي هي البيئة التجريبية في البنك المركزي وفي هيئة سوق المال وكلاهما طلعوا شركات سعودية كبيرة وناجحة مثل تابي وتمارة وسيركليز ومنافع وليندو وتعميد وصكوك وأبيان ودراهم وملاءة. اليوم البيئة التجريبية الهدف منها انه يكون في اشراف من المشرع، حوكمة أعلى، ومرونة، والهدف منها هو تجربة نماذج عمل جديدة إذا تخدم البلد تتحول الى تشريعات ولوائح وتتخرج من البيئة التجريبية وتصبح عندها رخصة كاملة. فاحنا الان في البيئة التنظيمية التجريبية نعمل تحت اشراف الهيئة ونتبع كل ارشاداتهم، إذا طلعت متطلبات الرخصة نلبيها ونتخرج لنصبح شركة مرخصة عندها لوائح وأنظمة واضحة.
عماد: ما شاء الله بالعكس يعني انا اعتقد انه السعودية كانت رائدة في انها تكون سباقة في هذا المجال يعني في المنطقة اعتقد ما في احد بدأ فيه لسه.
صالح الغامدي: صحيح، طبعاً الامارات فيه توكنايزيشن بس ممكن طريقته شوية مختلفة، لكن السوق السعودي سوق مميز ومغري والناس يحبون السوق السعودي، ففي كثير فرص ايجابية موجودة.
عماد: تمام طيب دحين انا السؤال الثاني حدمجهم في واحد، الان لما يتقسم العقار الى "توكنز" (Tokens) وتصدر عليها صكوك مصغرة خلينا نقول لكل مستثمر، هذه الصكوك تكون مسجلة فين؟ هل هي نفس طريقة تسجيل الصكوك الالكترونية العادية او لها طريقة ثانية؟ وهل لها سوق تداول مختلف؟
صالح الغامدي: طبعاً تسجل في السجل العقاري، وهذا بيوضح بإذن الله تعالى قريباً خلال شهرين. فيما يخص خطة التداول، الهيئة أعلنت انه يوجد نية للسماح بالتداول فنتوقع بإذن الله خلال ثلاث شهور (بحد أقصى شهر يوليو) يكون فيه امكانية تداول بحيث انك تدخل على المنصة اللي شريت منها وتقول والله انا شريت بـ 1000 ريال ابغى ابيع بـ 1050 ريال، هذه الخاصية موجودة اليوم كفكرة عند الهيئة وأعلنها سعادة الرئيس، وهذا الشيء ايجابي طبعاً للسوق بحيث ان الافراد اللي يبحثون عن التخارج المبكر يكون الخيار عندهم موجود.
عماد: طيب الان حندخل في القسم الثالث من المقابلة اللي هو نتكلم على رحلة الاعمال بشكل عام، اليوم ما شاء الله تبارك الله نبارك لكم حصلتوا على جولة استثمارية تقريباً بـ 7.1 مليون دولار، حابين نعرف التحديات اللي واجهتكم في رحلة البحث عن التمويل؟ وايش نصيحتك لرواد الاعمال اللي بيسعوا ياخذوا استثمار؟
صالح الغامدي: طبعاً السوق قاعد يصير اصعب من ناحية ريادة الاعمال بسبب سهولة الانطلاق في التقنية، فصارت المنافسة اكثر حدة، فلابد اولاً ان يكون عندك الشريك المناسب (تقني، تشغيلي) وعندكم "ألاينمنت" (Alignment) على الرؤية. الجزئية الثانية التعامل مع المستثمرين حساس ومهم لابد انه يكون عندك "بيتش ديك" (Pitch deck) مرتب ويكون عندك وضوح. غالب الامر السوق الان تغير ما صار بس يتبع الرخص، السوق صار الان يتبع الاداء والالتزام في العمل (Commitment). فإذا كان المؤسس عنده التزام عالي وخبرة سابقة وقدرة على الصبر فيقدر ينجح بإذن الله تعالى.
عماد: طيب بالنسبة لصالح هل انت الان مستثمر في تقريباً ما شاء الله 29 شركة ناشئة؟ حابين نعرف كيف اثرت خبرتك كمستثمر على طريقة ادارتك وتطويرك لغانم؟
صالح الغامدي: طبعاً العمل لي سنوات انا اجلس مع مؤسسين شركات مختلفة، فكل واحد تستفيد منه، واتوقع اكثر درس مفيد هو إدارة السيولة وإدارة المستثمرين والتخطيط المالي، هذه جزئية مهمة إذا قدرت تنجح فيها تزيد نجاح الشركة، غير كذا طريقة التعامل مع الموظفين وتحفيزهم.
عماد: طيب بالنسبة لبناء فريق العمل حالياً انتم كشركة ناشئة هو المفتاح الرئيسي لنجاح اي شركة، ايش اهم الصفات اللي يدور عليها صالح في توظيف اعضاء جدد في غانم؟
صالح الغامدي: بصراحة "الكوميتمنت" (Commitment) او الالتزام والجدية في العمل مهمة جداً، الشيء الثاني حب الانجاز بما معناه انه يكون شخص يبحث عن النتائج (Outcome) اكثر من "البزي ورك" (Busy work)، والشيء الثالث هو حب التعلم، اتوقع هذه الثلاث اشياء هي الاهم لانه المهارة تجي بعدها بسهولة بإذن الله.
عماد: جميل جداً طيب الان بالنسبة لبرنامج زمالة مسك او كونك زميل في برنامج مسك القيادة لعام 2020 اعتقد من اوائل الدفعات كانت ما شاء الله، كيف ساهم برنامج زي هذا في صقل مهاراتك القيادية ودعم مسيرتك؟
صالح الغامدي: الصراحة البرنامج كان جميل لأنه كان يجيب لنا "كيس ستديز" (Case studies) معقدة جداً وكنا نجلس مع خبراء من كندا وامريكا ومستشارين ممتازين، فكنا نتكلم بتفاصيل عن "إيدج كيسز" (Edge cases) قوية جداً، بالنسبة لنا ذاك الوقت ما كان عندنا مثل هذا التدريب موجود في السعودية فبالعكس انا شاكر لمسك على هذا البرنامج الجميل استفدنا منه مرة كثير.
عماد: اكيد اكيد ما شاء الله مؤسسة مسك بشكل عام برامجها بتمكن الشباب. الجزء الاخير من المقابلة اليوم بنتكلم على الرؤية المستقبلية ونصائحك للشباب، كبداية ايش رؤيتك المستقبلية لتطبيق غانم؟ يعني ايش هي خطط التوسع وهل في انواع عقارات جديدة او دخول في اسواق جديدة؟ كيف تشوف غانم بعد عشر سنين من اليوم، في ظل رؤية 2030 كيف تشوف مستقبل قطاع "البروبرتيك" (PropTech) في السعودية؟
صالح الغامدي: اتوقع والله اعلم انه في تطورات الان قاعدة تصير مثلاً دور الوسطاء قاعد يكبر، الشيء الثاني حيكون في رؤية اكبر للتوازن العقاري بكل انواعه سواء الاراضي البيضاء او نسب الاشغال للعقارات القائمة، وهذا بيدفع السوق لتوازن منطقي. بيكون في نمو في بعض القطاعات الجديدة مثل "الاستوديوز" والعقارات التي تباع للاجانب والبيوت المناسبة للعوائل الصغيرة والكبيرة، ففي "سيجمنتس" (Segments) بتطلع بتكون جميلة جداً.
عماد: اكيد المستقبل ان شاء الله حيكون مشرق، طيب الان بصفتك رائد اعمال ناجح ومستثمر متمكن ايش اهم نصيحة تقدمها للشباب السعودي اللي يطمح لدخول عالم ريادة الاعمال تحديداً "البروبرتيك"؟
صالح الغامدي: النصيحة انه ابدأ باختبار المنتج قبل ما تسوي التزامات كبيرة، اليوم بوجود الذكاء الاصطناعي بامكان اي شخص انه يبني المنتج ويبيعه ويختبره في السوق ويتاكد من حاجة السوق له. النصيحة الثانية ان التوقيت المناسب للسوق مهم "لا تبدأ تو إيرلي ولا تو ليت" (Don't start too early or too late).
عماد: ما شاء الله حصلت على وسام الملك عبدالعزيز من الدرجة الثالثة، ايش يعني لك هذا التكريم على المستوى الشخصي والمهني؟
صالح الغامدي: الحمد لله، بالنسبة لي هو دافع للعطاء (Give back to the community)، وباذن الله انه يكون دافع ايجابي، وطبعاً انت عارف احنا من عوائل محافظة فبالنسبة لنا شيء زي كذا يفرق معانا في التقدير من ناحية العائلة وكذا فبالعكس انا "فيري هابي" (Very happy) الحمد لله.
عماد: ما شاء الله تبارك الله، يعني انا اسئلتي خلصت واعتقد ما شاء الله تبارك الله انه بكل امانة هذه اول مقابلة مسجلة انا اسويها، انا مبسوط جداً باللي سويناه مع بعض واشوف انه حتكون مقابلة فارقة في مسيرة لقاءاتي القادمة بإذن الله.
تعليقات